Një situatë shqetësuese është regjistruar në superstradën Lezhë – Milot, pranë urës mbi Lumi Mat, ku zona është mbuluar nga shtellunga të dendura tymi të zi që po vështirësojnë qarkullimin e automjeteve në këtë aks të rëndësishëm rrugor.
Sipas informacioneve nga zona, shkak është bërë djegia e gomave të përdorura, të cilat hidhen vazhdimisht pranë brigjeve të lumit dhe më pas u vihet flaka. Si pasojë, tymi i dendur është përhapur në të gjithë zonën përreth, duke krijuar rrezik serioz për drejtuesit e mjeteve që kalojnë në këtë segment të superstradës.
Pamjet tregojnë se re të mëdha tymi të zi ngrihen mbi rrugë dhe mbi lumin Mat, duke ulur ndjeshëm shikueshmërinë dhe duke krijuar një situatë të rrezikshme për qarkullimin rrugor. Drejtuesit e mjeteve detyrohen të ulin shpejtësinë dhe të kalojnë me kujdes të shtuar për të shmangur aksidentet.
Banorët e zonës thonë se kjo situatë nuk është e re dhe është përsëritur disa herë gjatë viteve të fundit. Sipas tyre, në brigjet e lumit hidhen shpesh goma të përdorura dhe mbetje të tjera, të cilave më pas u vihet zjarri, duke shkaktuar ndotje të rëndë të ajrit dhe të mjedisit.
Ekspertët e mjedisit paralajmërojnë se djegia e gomave çliron në ajër substanca shumë të rrezikshme dhe toksike, të cilat dëmtojnë shëndetin e njerëzve dhe ndotin rëndë ekosistemin përreth. Për këtë arsye, situata po cilësohet nga shumë banorë dhe aktivistë si një katastrofë ekologjike, pasi ndotja prek jo vetëm ajrin, por edhe lumin dhe tokën përreth.
Pavarësisht se kjo situatë është denoncuar disa herë, institucionet përgjegjëse ende nuk kanë reaguar për të ndalur këtë fenomen, ndërsa djegia e gomave vazhdon të krijojë ndotje të rëndë në një nga akset kryesore kombëtare të vendit.