Kryeministri i Izraelit, Benjamin Netanyahu, ka reaguar publikisht ndaj akuzave mbi rolin e Shteteve të Bashkuara në fazat e hershme të konfliktit, duke mohuar kategorikisht çdo pretendim për manipulim.
“Nuk kam mashtruar askënd”, deklaroi Netanyahu, teksa iu përgjigj pyetjeve mbi përfshirjen amerikane dhe raportet me administratën në Uashington.
Ai theksoi gjithashtu se nuk kishte pasur nevojë të bindte presidentin amerikan Donald Trump për rëndësinë e ndalimit të Iranit në zhvillimin e programit të tij bërthamor, duke nënvizuar se mes tyre ekzistonte një mirëkuptim i plotë për këtë çështje strategjike.
Sipas Netanyahut, partneriteti me Trump mbetet një element kyç për të përballuar kërcënimin që paraqet Irani, të cilin e cilësoi si një rrezik serioz për sigurinë rajonale dhe globale.
Deklaratat e tij vijnë në një moment tensionesh të larta në Lindjen e Mesme, ku çështja e programit bërthamor iranian vijon të jetë në qendër të përplasjes politike dhe ushtarake mes aktorëve kryesorë ndërkombëtarë.