Ervin Salianji konfirmon se do të kandidojë për kryetar të Partisë Demokratike në 23 maj, duke sfiduar Sali Berishën.
I ftuar në emisionin “Të Paekspozuarit”, Salianji tha se do të hyjë në garë edhe pse Flamur Noka, Sekretari i Përgjithshëm i Partisë, ka deklaruar se Salianji është vetë-përjashtuar nga partia.
“Po do të jem në garë për kryetar të Partisë Demokratiek në 23 maj.
Pavarësisht se kur ka zgjedhje, e dini që publikohen gjashtë muaj para listat zgjedhore dhe jepet mundësi e barabartë, sot në PD nuk ka procedurë të përcaktuar qartë, por ka vetëm datë zgjedhjesh.
Ajo që e përcakton dhe ndan se kë mbështet shumica, përcaktohet nëpërmjet votës, pavarësisht se politika në përgjithësi duhet të mbahet si domain, apo territor ku fjala e mbajtur përcakton politikanët. Berisha në 2022 kur u rikthye, ka thënë do ta mundë Ramën, nuk mi vjedh zgjedhjet, do të fitoj zgjedhjet lokale e me rradhë. Të gjitha nuk kanë ndodhur”, deklaroi Salianji.
I pyetur për deklaratat e Sekretarit të Përgjithshëm të PD-së, i cili e quajti të “vetë-përjashtuar”, ai tha se nuk e merr seriozisht dhe se është anëtar i kryesisë së PD, ndaj mund të kandidojë normalisht.
“E merr seriozisht atë ti? Bëj pyetje serioze. Jam anëtar i kryesisë, “heroi” apo martiri i fjalës së lirë, për shkak të sakrificës, betejave. Do të ishte më e ndershme të thoshte, nuk do të ketë zgjedhje në PD, pasi kjo është parti monarkike. Nuk ma përcakton dot ai”, tha Salianji.