Zbulohet kush është shtetasi kinez që humbi jetën nga aksidenti tragjik në aksin Librazhd-Elbasan pak më parë.
Sipas mediave kineze, ai është Li Jianhong, kryetar dhe president i Xinjiang Grand Scape Group dhe themelues i resortit të skive Silkroad Mountain në Urumqi.
Li Jianhong lindi në dhjetor të vitit 1965 në qarkun Zepu, në prefekturën Kashgar të Xinjiangut. Në vitin 1993 ai la punën në një institut telekomunikacioni në Guangzhou për t’u kthyer në Xinjiang dhe për të ndërtuar biznesin e tij.
Grupi Xinjiang Grand Scape, me aktivitete në telekomunikacion, turizëm dhe menaxhim investimesh, është shndërruar në një ndërmarrje të madhe me asete totale rreth 1.4 miliardë juanë (rreth 205 milionë dollarë). Në tre vitet e fundit, kompania ka realizuar të ardhura prej afro 1.98 miliardë juanë dhe ka punësuar rreth 2.500 persona.
Në vitin 2002, grupi ishte ndër themeluesit e Xinjiang International Grand Bazaar, një nga simbolet kryesore të qytetit Urumqi, nga i cili u tërhoq në vitin 2017.
Resorti Silkroad Mountain, i themeluar nga Li në vitin 2003, është një nga më të mëdhenjtë në Kinë dhe ka shërbyer si një nga vendet e garave për Lojërat Kombëtare Dimërore në vitin 2016.
Li ishte gjithashtu një sportist i apasionuar pas skive dhe alpinizmit. Ai përfundoi “Explorer’s Grand Slam”, duke ngjitur shtatë majat më të larta të botës dhe duke arritur në të dy polet. Në vitin 2018, në moshën 53-vjeçare, ai arriti majën e Everestit dhe në të njëjtën periudhë edhe Lhotse-n, malin e katërt më të lartë në botë.