Këshilli i Ministrave ka miratuar një vendim që parashikon kompensim financiar për bizneset për të mbuluar një pjesë të kostos shtesë të krijuar nga rritja e pagës minimale nga 40 mijë në 50 mijë lekë. Skema e kompensimit do të zbatohet për periudhën kontributive janar–shtator 2026 dhe do të mbulojë kontributet e sigurimeve shoqërore dhe shëndetësore që paguan punëdhënësi.
Vendimi përcakton rregullat dhe kriteret për kompensimin e kontributeve të punëdhënësit që lindin si rezultat i rritjes së pagës minimale. Shteti do të kompensojë çdo muaj bizneset për pjesën e kontributeve të llogaritura mbi diferencën midis pagës së mëparshme dhe pagës së re minimale.
Masa e kompensimit llogaritet mbi normën e kontributeve të punëdhënësit prej 16.7 për qind dhe aplikohet mbi diferencën midis pagës bruto të deklaruar në shtator 2025 dhe nivelit të ri të pagës minimale prej 50 mijë lekësh.
Skema bazohet në numrin maksimal të punonjësve që në listëpagesën e shtatorit 2025 rezultonin me pagë bruto nga 40 000 deri në 49 999 lekë. Kjo referencë përdoret për të përcaktuar bazën e kompensimit për çdo subjekt përfitues.
Kompensimi do të shpërndahet nga drejtoritë rajonale të Agjencisë Kombëtare të Punësimit dhe Aftësive. Pagesat do të kryhen çdo muaj përmes sistemit të thesarit dhe bankave të nivelit të dytë, brenda 10 ditëve të para të muajit pasardhës.
Subjektet duhet të aplikojnë elektronikisht përmes portalit e-Albania nga data 1 prill deri më 31 tetor 2026. Për të përfituar nga skema, bizneset duhet të mos kenë detyrime të papaguara për kontributet e sigurimeve dhe nuk duhet të jenë subjekte në pronësi shtetërore apo të regjistruara si të vetëpunësuar.
Në rast se një subjekt redukton numrin e punonjësve gjatë periudhës së kompensimit, masa e përfitimit rillogaritet mbi bazën e numrit aktual të punonjësve.
Efekti financiar për këtë skemë përballohet nga buxheti i shtetit për vitin 2026, në programin “Tregu i punës” të Ministrisë së Ekonomisë dhe Inovacionit.
Vendimi:
Në mbështetje të nenit 100 të Kushtetutës dhe të pikës 9, të nenit 11, të ligjit nr.87/2025, “Për buxhetin e vitit 2026”, me propozimin e ministrit të Ekonomisë dhe Inovacionit, Këshilli i Ministrave
V E N D O S I:
1. Dhënie kompensimi financiar çdo muaj, për periudhën kontributive janar–shtator 2026, për kontributet e sigurimeve shoqërore dhe shëndetësore të punëdhënësit për subjektet që preken nga rritja e pagës minimale.
2. Subjektet përfituese të kompensimit financiar duhet të ushtrojnë aktivitet në të gjithë sektorët ekonomikë të nomenklaturës së veprimtarive ekonomike dhe të plotësojnë kriteret e përcaktuara në pikën 5, të këtij vendimi.
3. Kompensimi financiar llogaritet dhe jepet bazuar në numrin maksimal të të punësuarve me fashën e pagës bruto, nga 40 000 (dyzet mijë) lekë deri në 49 999 (dyzet e nëntë mijë e nëntëqind e nëntëdhjetë e nëntë) lekë, që figurojnë në listëpagesën e deklaruar në organet tatimore për muajin shtator 2025, për përditësimin më të fundit të bërë gjatë vitit 2025.
4. Kompensimi financiar për subjektet jepet çdo muaj, për periudhën kontributive janar–shtator 2026, nga Drejtoria Rajonale e Agjencisë Kombëtare të Punësimit dhe Aftësive (DRAKPA), ku kanë adresën e vendit, në të cilin zhvillohet pjesa kryesore e veprimtarisë tregtare.
5. Subjektet me të drejtë aplikimi duhet të plotësojnë kriteret, si më poshtë vijon:
a) Të mos kenë një punonjës në total të regjistruar në listëpagesë;
b) Të mos jenë subjekte në pronësi shtetërore apo ente publike;
c) Të mos jenë subjekte të regjistruara në statusin e sigurimeve si:
i. i vetëpunësuar (i vetëm);
ii. i vetëpunësuar me punëmarrës dhe punonjës të papaguar të familjes;
iii. i vetëpunësuar pa punëmarrës dhe punonjës të papaguar të familjes.
ç) Të mos kenë detyrime (principal) ndaj organeve tatimore për kontributet e sigurimeve shoqërore dhe shëndetësore në momentin e aplikimit.
6. Subjektet aplikojnë në mënyrë elektronike nëpërmjet portalit “e-Albania” për periudhën që kërkojnë kompensim, duke filluar nga data 1 prill 2026 deri më 31 tetor 2026.
7. Kompensimi financiar jepet në masën e kontributeve shoqërore dhe shëndetësore të punëdhënësit, 16.7%, llogaritur mbi diferencën e pagës së çdo punonjësi me pagë bruto, nga 40 000 (dyzet mijë) lekë deri në 49 999 (dyzet e nëntë mijë e nëntëqind e nëntëdhjetë e nëntë) lekë në shtator 2025, me pagën 50 000 (pesëdhjetë mijë) lekë.
8. Për subjektet, të cilat në muajin që kërkojnë kompensim kanë reduktuar numrin e punonjësve totalë në më pak se numri i punonjësve me pagë bruto, nga 40 000 (dyzet mijë) lekë deri në 49 999 (dyzet e nëntë mijë e nëntëqind e nëntëdhjetë e nëntë) lekë në shtator 2025, kompensimi financiar jepet mbi shumën mesatare të fondit që do të përfitonte për punonjës, në rast mosreduktimi të numrit të punonjësve, sipas pikës 1, të këtij kreu, shumëzuar me numrin aktual të punonjësve në total.
9. Verifikimi i aplikimit kryhet nëpërmjet ndërveprimit elektronik të sistemeve dhe shpërndarja për përfituesit e këtij vendimi bëhet nga drejtoritë rajonale të AKPA-s.
10. Për kryerjen e kompensimit financiar, DRAKPA-ja urdhëron pagesën çdo muaj pranë strukturës së thesarit në degë, brenda 10-ditëshit të parë të muajit, për të gjitha kërkesat e muajit paraardhës. Kryhen aq urdhërpagesa sa janë bankat e nivelit të dytë (BND), me të cilat operojnë subjektet përfituese të kompensimit financiar. Pagesa urdhërohet në llogarinë tranzitore të pagave në BND për shumën totale të subjekteve përfituese në atë bankë dhe paralelisht DRAKPA-ja dërgon në BND listën e subjekteve përfituesve në bankën përkatëse me të dhënat e llogarisë bankare dhe shumën e kompensimit për çdo subjekt.
11. Efekti financiar për periudhën janar – shtator 2026 përballohet nga buxheti i shtetit, miratuar për vitin 2026, në programin “Tregu i punës”, për Ministrinë e Ekonomisë dhe Inovacionit.
12. Ngarkohen Ministria e Ekonomisë dhe Inovacionit, Agjencia Kombëtare e Punësimit dhe Aftësive dhe Drejtoria e Përgjithshme e Tatimeve për zbatimin e këtij vendimi.
Ky vendim hyn në fuqi pas botimit në “Fletoren zyrtare”.