Aeroporti Ndërkombëtar i Dubait ka njoftuar se po pezullon përkohësisht të gjitha operacionet. Sipas një deklarate përkatëse, vendimi u mor për sigurinë e pasagjerëve, stafit të aeroportit dhe ekuipazheve të linjave ajrore.
Linja ajrore Emirates njoftoi se të gjitha fluturimet drejt dhe nga Dubai janë pezulluar deri në një njoftim të ri.
Kompania e bëri të ditur vendimin përmes një postimi në rrjetin social X, duke theksuar se operacionet ajrore janë kufizuar për shkak të situatës së sigurisë dhe kufizimeve në hapësirën ajrore të rajonit.
Presidenti iranian, Masoud Peskov, tha se vendi do të “qëndrojë deri në fund” dhe se nuk do të ketë dorëzim, duke u bërë thirrje iranianëve të lënë mënjanë mosmarrëveshjet e brendshme dhe të bashkohen për të mbrojtur vendin.
Ai theksoi gjithashtu se Teherani nuk kishte ndërmend të sulmonte vendet fqinje dhe se sulmet do të kryheshin vetëm nëse një sulm ndaj Iranit do të niste nga territori i tyre. Sipas mediave iraniane, vendimi përkatës u miratua nga këshilli i udhëheqjes kalimtare të vendit.
Presidenti iranian gjithashtu u kërkoi falje shteteve fqinje për çdo dëm që mund të jetë shkaktuar nga sulmet e ditëve të fundit dhe u bëri thirrje vendeve në rajon të mos bëhen “mjete” të Izraelit ose Shteteve të Bashkuara, por të kërkojnë zgjidhje përmes diplomacisë.
Autoritetet evropiane të aviacionit kanë rekomanduar që linjat ajrore të shmangin pjesën më të madhe të hapësirës ajrore të Lindjes së Mesme për shkak të rrezikut nga sulmet me raketa dhe dronë, ndërsa shumë kompani kanë pezulluar përkohësisht fluturimet komerciale dhe po kryejnë kryesisht operacione riatdhesimi.